Franco Marchetta (Udin,1952 - 28 di Mai 2014) al è stât un scritôr, un autôr teatrâl e un critic furlan.
Al à publicât tal 1993 un libri di contis dal titul Il tempo morbido (Campanotto Editore), che al contignive la conte Dissolvenze che e veve vinçût tal 1992 il Premio Nazionale Carnia.
Daspò di un periodi di colaborazion pe critiche teatrâl cun Il Gazzettino, si è impegnât tes produzions in lenghe furlane publicant tal 1998 il romanç Madalene (Ribis Editore), che al à vinçût il Premi San Simon; tal 2002 il romanç Gilez (Forum Editrice) e tal 2005 il saç Il sium di chescj furlans in fughe
(Forum Editrice) a conclusion di une trilogje furlane sul rinovament de
lenghe (chescj lavôrs a son fra i tescj segnalâts tal cercin dal
Dipartiment di filologje romanze de Universitât di Udin).
Autôr ancje pal teatri (Il noce del pajo, 1992), tal 2001 al è stât invidât a scrivi une opare pal Premio Candoni (Il sogno della falena),
metût in vore al Teatri San Zorç di Udin, pe regje di Rita Maffei (cun
Ariella Reggio, Maurizio Zacchigna, Fabiano Fantini e Giorgio Monte), in
ocasion di chê manifestazion internazionâl. Par Paolo Gaspari Editore
al à publicât, tal 2006, Storia brevissima di Codroipo, une voglade su doimil agns di storie.
Tal 2011 al à tornât a vinci il Premi San Simon cun Cronichis di Saveri Sengar, une opare componude di doi romançs seriâi: Achì no ài viodût une pavee e Il numar 1089, publicâts de cjase editorie Forum tal mês di otubar dal 2012. Simpri in chel an al à scrit U-, un romanç che al è un omaç a la leteradure in gjenerâl, ma soredut a autôrs furlans come Bartolini, Giacomini, Maldini, Maurensig, Tam e Morat.
Cun chest romanç, dulà che i personaçs si movin intun mont componût des
tramis di ducj i romaçs possibii e a jentrin in contat cun altris
personaçs leteraris, al à vinçût pe tierce volte il Premi San Simon.
(tratto da Vichipedie. La enciclopedie libare)